نظر خلقده پاک اول
جهد ائیله سن آنجاق نظر خلقده پاک اول
مخلوقی ایناندیر
خاصیتین اود اولسادا، اطوارده خاک اول
سوک عالمی، یاندیر
خلقین نظرین جلب ائله قورشاغه قبایه
مجلوب عیون اول
هر حیله و بیژلیکله گیر، البته، عبایه
ایمانه ستون اول
سعی ائیله کی، ساققال اوزانیب اوچ چره‌ک اولسون
پاپاق اونا نسبت
قورشاق‌دا، بیلیرسن کی، اون آرشین گره‌ک اولسون
تفضیله نه حاجت
قویما یئره تسبیحینی، ال چکمه دعادن
اوراد اوخو دایم
مجلسده چکیب دوت اوزونو، اول نجبادن
سوز سویله ملایم
ایشته گئیینیب مذهبی، ایمانی بوروندون
پک محترم اولدون
ایندی نظر خلقده سن پاک گوروندون
اهل کرم اولدون
باشدان آیاغا امن و آمان اولدی وجودون
زهد ایله بیتیشدین
نولماق دیله‌ییر دینسه همان اولدی وجودون
مقصوده یئتیشدین
وقت اولدوکی، ایندی ائده‌سن عالمی تالان
دوت قویما قاچانی
حکم ایندی سنیندیر، دخی چک ایشلره سامان
ییغ مشکل آچانی
دول عورته بیداد ائله، ایتامه خیانت
خوف ائتمه اجلدن
مکر ایسه اوزون قیل، اوخو شیطانه ده لعنت
شاد اول بو عملدن
ال چکمه حیل‌دن
تزویر و دغل‌دن
ایمانی‌ده وئرسن
وئرمه پولی الدن
