آذربایجان 

  چوخ کئچمیشم بو داغلاردان،

 دورنا گؤزلو بولاقلاردان؛

 ائشیتمیشم اوزاقلاردان 

ساکیت آخان آرازلاری؛ 

سینامیشام دوستو، یاری...


  ائل بیلیر کی، سن منیمسن،

  یوردوم، یووام، مسکنیمسن، 

آنام، دوغما وطنیمسن! 

آیریلارمی کؤنول جاندان؟ 

آذربایجان، آذربایجان!

 

من بیر اوشاق، سن بیر آنا، 

اودور کی، باغلییام سانا، 

هانکی سمته، هانکی یانا 


هئی اوچسام دا یووام سنسن، 


ائلیم، گونوم، اوبام سنسن! 

فقط سندن گئن دوشنده، 

آیریلیق مندن دوشنده، 

ساچلاریما دن دوشنده 

بوغار آیلار، ایللر منی، 

قیناماسین ائللر منی.


داغلاری نین باشی قاردیر، 

آغ اؤرپگین بولودلاردیر. 

بؤیوک بیر کئچمیشین واردیر؛ 

بیلینمه ییر یاشین سنین، 


نه لر چکمیش باشین سنین. 


دوشدون اوغورسوز دیللره، 

نحس آیلارا، نحس ایللره، 

نسیللردن- نسیللره 

کئچن بیر شؤهرتین واردیر؛ 

اوغلون، قیزین بختییاردیر... 


هئی باخیرام بو دوزلره، 

آلاگؤزلو گوندوزلره، 

قارا خاللی آغ اوزلره 

کؤنول ایستر شعر یازا؛ 

گنجلشیرم یازا-یازا... 


بیر طرفین بحری- خزر، 

یاشیل باش صونالار گزر؛ 

خیالیم دولاشار گزر 

گاه موغانی، گاه ائلداری. 

منزیل اوزاق،عؤمور یاری! 


سیرا داغلار، گئن دره لر، 

اورک آچان منظره لر... 

جئیران قاچار، جویور مه لر، 

نه چوخدور اویلاغین سنین! 

آرانین، یایلاغین سنین. 


کئچ بو داغدان، بو آراندان، 

آستارادان، لنکراندان. 

آفریکادان، هیندیستاندان 

قوناق گلیر بیزه قوشلار، 

ظولم الیندن قورتولموشلار... 


بو یئرلرده لیمون ساری، 


اییر، سالیر بوداقلاری؛ 


داغلاری نین دوماغ قاری 

یارانمیشدیر قارلی قیشدان 

بیر سنگردیر یارانیشدان. 

لنکرانین گولو رنگ-رنگ، 

یوردوموزون قیزلاری تک. 

دمله چایی تؤک وئر ایچک 

آنامین دیلبر گلینی! 

یادلارا آچما الینی. 

ساری سونبول بیزیم چؤرک، 

پامبیغیمیز چیچک- چیچک. 

هر اوزومدن بیر شیره چک 

سحر- سحر آج قارینا، 

قوووت اولسون قوللارینا.

مین قازاخدا کؤهلن آتا، 

یالمانینا یاتا- یاتا، 

آت قان- تره باتا- باتا، 

گؤی یایلاقلار بئلینه قالخ، 

کپز داغدان گؤی گؤله باخ! 

ائی آزاد گون، آزاد اینسان، 

دویونجا ایچ بو باهاردان! 

بیزیم خاللی خالچالاردان 

سر چینارلار کؤلگه سینه، 

آلقیش گونش اؤلکه سینه! 


کؤنلوم کئچیر قاراباغدان، 

گاه بو داغدان، گاه او داغدان. 

آخشام اوستو قوی اوزاقدان 

هاوالانسین خانین سسی، 

قاراباغین شیکسته سی. 

گؤزل وطن! معنان درین، 

بئشیگیسن گؤزللرین! 

آشیق دئیر سرین- سرین، 

سن گونشین قوجاغیسان، 

شعر، صنعت اوجاغیسان. 


اؤلمز کؤنول،اؤلمز اثر، 

نیظامی لر، فوضولی لر! 

الین قلم، سینن دفتر، 

دئ گلسین هر نیین واردیر، 

دئییلن سؤز یادیگاردیر.  

بیر دؤن بیزیم باکییا باخ، 

ساحیللری چیراق- چیراق، 

بوروقلاری هایقیراراق 

نعره سالیر بوز چؤللره، 

ایشیقلانیر هر داغ، دره! 

نازلاندیقجا سرین کولک، 

ساحیللره سینه گرک. 

بیزیم باکی - بیزیم اورک! 

ایشیقدادیر قوووت سؤزو، 

سحرلرین اولکر گؤزو.


گؤزل وطن! او گون کی سن 

آل بایراقلی بیر سحردن 

ایلهام آلدین... یاراندیم من. 

گولور تورپاق، گولور اینسان، 

قوجا شرقین قاپیسیسان! 

دینله منی، گؤزل وطن! 


بیر سؤز گلیر اورگیمدن: 

پارتییانین عشقیله سن، 

گوله جکسن هر بیر زامان، 

آذربایجان، آذربایجان! 



پنجشنبه 30 بهمن 1393