لایلای گولوم لایلای ...
لایلالار آنالارین اوشاقلاری یاتیرتماق اوٍچون اوْخودوقلاری شعرلر دیر.آذربایجان لایلالاری فورم باخیمیندان بایاتی کیمیدیر . لایلالاری بایاتیلار دان فرقلندیرن جهت ایسه اونون مضمونو دور . فورم باخیمیندان دا بیر کیچیک فرق اؤزونو گؤسترمکده دیر. اگر بایاتیلارین اوّلی "عزیزیم" ، "من عاشیق "، "عاشیغام" سؤزلریله باشلاییرسا ، لایلالار دا "لایلا" سؤزو یا "لایلا دئدیم، لایلا دئییم "سؤزلری گلیر.
ایندی ایسه لایلالاردان بیر نئچه سینی بوردا گتیریره م:
لایلا دئدیم یاتاسان
قیزیل گوله باتاسان.
قیزیل گولون ایچینده
شیرین یوخو تاپاسان.
***
لایلای بئشیگیم لایلای،
ائویم ائشیگیم لایلای
اوزون گئجه لر بویو
چکیم کئشیگین لایلای.
***
لایلای دئدیم اوجادان
سسیم چیخمیر باجادان
تانری سنی ساخلاسین
چیچکدن، قیزیلجادان.
***
لایلای دئدیم یاتینجا
گؤزلرم آی باتینجا
جانیم دوداغا یئدی،
سن حاصیله چاتینجا.
***
لایلای دئدیم، جان دئدیم،
یوُخودان اوْیان دئدیم.
سن یوُخودان دوُرونجا
جانیمی قوربان دئدیم.
***
لایلای دئدیم یاتاسان
شیرین یوخو آلاسان
شیرین یوخو ایچینده
منی یادا سالاسان.
***
بالامین یوخوسو گلیر
لایلایی نین سسی گلیر
اوزاق اوزاق داغلاردان
بالامین دائیسی گلیر
***
لایلای منه قالان لایلای
شیرین دیللی بالام لایلای
***********
منبع مطلب .وبلاگ